ಏಳುತ ಬೀಳುತ ಬೊಬ್ಬೆಯ ಹೊಡೆದು

ಅಲೆದಾಡುತ ನೆಮ್ಮದಿ ಹುಡುಕುತಿಹವು

ಹಸಿ-ಬಿಸಿ ಉಸಿರಲಿ ಬೆರೆತು ಕಲೆತು

ತನ್ನಯ ರಾಗಕೆ ತಾಳವ ಬಯಸುತ

ಬೆಂಬಲ ದನಿಯನು ಬೇಡುತಿಹವು

ಅಲೆ ಅಲೆಯಾಗಿ ತೇಲಿ ಸಾಗುತಿರೆ

ಹೊನಲು ಬೆಳಕಿನ ದಿವ್ಯ ಸ್ಪಂದನ

ಬಾಳಿನ ಭಾಗ್ಯದ ಬಾಗಿಲು ಸಿಂಗಾರ

ಒಬ್ಬರಿಗೊಬ್ಬರಿಗಿರಲು ಅರಿವ ಮನ

ಬಿಟ್ಟರೆ ದೂರ ಸೆಳೆಯಲು ಹತ್ತಿರ

ಬದುಕಿನ ಬಿಂದು ಸುಂದರ ಅಮರ

ಸೂತ್ರಧಾರಿ ಪಾತ್ರಧಾರಿ ನಾವುಗಳು

ಒಡೆದು ಒಂದಾಗುವ ಇಬ್ಬಗೆ ಭಾವ

ಅರಿಯಲು ಸಾಧ್ಯವೇ ಮನುಜ ಭಾವ!

ಮೌನವೇ ಮಾತಾಗಿಹ ಕವಿತೆ ಸಾಲು

ಮೌನ ಬಿತ್ತರದಿ ಅರ್ಥ ಮಹತ್ತರವು

ಸಿಹಿ ಬಯಕೆ ಮೌನ ಯಾನದ ಮಿಂಚು

ಬಳಲಿದ ಮನಗಳಿಗೆ ಮೌನ ಮಂದಾರ

ಮುದ ನೀಡುವ ಮೌನ ಬಂಗಾರ ಸಿರಿ

ಬೇಡದ ಮಾತಿಗೆ ತಂಪು ಜಳಕದ ಉತ್ತರ

ಶಾಂತಿ ಮಾರ್ಗದ ತೊಂದರೆ ನಿವಾರಕ

ಹರುಷದ ಹಾದಿಯ ಸಂತೃಪ್ತಿಯ ವಾಹಕ

ನೋವು-ನಲಿವು ಭಾವವು ಹತ್ತಿರ ಬಿತ್ತರ 

ಜೀವ ತೆತ್ತವರ ಮನೆಯ ನೀರವ ಮೌನ

ಅನ್ಯಾಯದ ವಿರುದ್ಧ ಕುದಿ ಮೌನ ಅಸದಳ

ವಿಧಿಯ ಆಟದಿ ಮೌನದ ಬಗೆ-ಬಗೆ ಚಿತ್ತಾರ

       (ದಿನದ ಶೀರ್ಷಿಕೆಗಾಗಿ)