೦೩.೧೧.೨೦೨೫

ವೀರ ಪುರುಷರು ಹುಟ್ಟಿ ಬೆಳೆದಿಹ

ಧೀರ ಶೂರರು ಮಿಂಚಿ ಮೆರೆದಿಹ

ಸಾರ ತುಂಬಿದ ನಾಡು ಕನ್ನಡ ಮೆರೆದು ನಿಂತಿಹುದು|

ಮೇರು ಮುಕುಟವು ಜಗದಿ ಬೆಳಗುತ

ತೇರನೆಳೆಯುತ ಹಾಡಿ ಕುಣಿಯುತ

ಬೇರು ಬಿಟ್ಟಿಹ ನೂರು ಧರ್ಮವು ಸೊಬಗು ಚೆಲ್ಲಿಹುದು||

ಅಂದ ನುಡಿಯದು ಕನ್ನಡನುಡಿಯು

ಚೆಂದ ಕೇಳಲು ಸೊಗಸಿನ ಸೆಲೆಯು 

ಬಂಧು ಬಳಗದಿ ಭಾವ ಬಂಧವ ಬೆಸೆದು ನಿಂತಿಹುದು|

ಕಂದನಾಡುವ ತೊದಲು ಮಾತದು

ನೊಂದ ಮನಸಿಗೆ ಸವಿಯನುಣಿಸುತ

ಗಂಧ ಸುಗಂಧ, ಬೀರಿ ಪರಿಮಳ ಹಿತವ ನೀಡಿಹುದು||

ಬನ್ನಿ ಕನ್ನಡ ಕುವರ ಮಣಿಗಳೆ

ತನ್ನಿ ದೀಪವ, ಬೆಳಕು ಬೆಳಗುವ

ಚೆನ್ನ ಕನ್ನಡ ಮಾತೆ ಮಹಿಮೆಯ ಸುತ್ತ ಪಸರಿಸಲು|

ಹೊನ್ನ ಬಣ್ಣದ ಹೊಂಗಿರಣದಲಿ

ಚಿನ್ನ ಚೆಲ್ಲಿದೆ ಬಣ್ಣ ಚಿತ್ತಾರ

ಮನ್ನ ಮಾಡಿದೆ ರೋಷ ದ್ವೇಷವ ತಾಯಿಯೊಲವಿನೊಲು||

ಅಂದ ಅಡಗಿಹ ನಾಡು ನೋಡಿದು

ಬಂಧ ಬೆಳೆಸುವ ಬೀಡು ನಮ್ಮದು

ಕಂದ ಕುಣಿಯಲು ಮಾತೆ ಮಡಿಲಲಿ ಸೊಗವುತುಂಬಿಹುದು|

ಚೆಂದ ನೋಡಲು ಕೃಷಿಯ ಬೀಡಿದು

ನೊಂದ ಮನಸಿನ ನೋವು ತೊರೆವುದು

ಬಂಧು ಬಳಗದಿ ಭಾವ ಬಂಧವ ಬೆಸೆದು ನಿಂತಿಹುದು||

ಅಚ್ಚ ಕನ್ನಡ ಬಳಸಿ ಉಳಿಸುವ

ಹಚ್ಚ ಹಸಿರಿನ ನಾಡ ಬೆಳೆಸುವ   

ಮೆಚ್ಚಿ ಪೊಗಳುವ ಕಲೆಯ ಕಾಣುವ ಕನ್ನಡ ನಾಡಲಿ |

ಇಚ್ಛೆಯಿಂದಲಿ ನುಡಿಯ ಕಲಿಯುತ

ಕಿಚ್ಚು ಕೀಳರಿಮೆಯನು ಸರಿಸುತ

ನೆಚ್ಚಿ ಮನಸಲಿ ಪ್ರೀತಿ ತೋರುವ ಭವ್ಯ ಬೀಡಿನಲಿ||

ಡಾ.ಸುಮತಿ ಪಿ