ನಿರೂಪಣಾ ಕವನ
ಇಂಚರ
Jan 09, 2026
ಭೋರ್ಗರೆವ ಭಾವದೊಲವ ಶರಧಿ ನೀನು
ಹೃನ್ಮನಸಂಗಮಕೆ ಕಾದ ನಿರ್ಝರಿಣಿ ನಾನು/
ಮಿಡಿವೆನು ಮೊರೆವ ಕಡಲ ಪ್ರೇಮದ ಕರೆಗೆ
ನಿನ್ನ ಸೇರುವ ಮಧುರ ಮೈತ್ರಿಯ ಒಸಗೆಗೆ/
ಭಾವಬೆಸುಗೆಯ ಜೀವರಾಗವಾಗಿ ಬಂದೆ
ಬರಡುಮನದಿ ಸವಿ ಒಲವಿನೊರತೆ ತಂದೆ/
ನಿನ್ನುಸಿರ ಸ್ಪರ್ಶಕೆ ಹೃದಯ ಕೊಳಲಾಗಿದೆ
ಮಾರ್ದನಿಯಲಿ ನಿನ್ನ ಹೆಸರನೆ ಉಲಿದಿದೆ/
ನಿನ್ನೊಲುಮೆಯ ಪಲ್ಲವದಲಿ ಚೈತ್ರದ ಇಂಚರ
ಹೃದಯಂಗಳದಿ ಮನಮಿಡಿವ ಝೇಂಕಾರ/
ಸಾಗರಸುಧೆಯ ಮಧುರಮೈತ್ರಿ ದಾಂಪತ್ಯ
ಆತ್ಮದಲಿ ಅನುರಣಿಸಲಿ ನಮ್ಮೀ ಸಾಂಗತ್ಯ/
✍
ಇತ್ತೀಚಿನ ಕಾಮೆಂಟ್ಗಳು
