ನಿರೂಪಣಾ ಕವನ
ಆತ್ಮ ಸಂಗಾತಿ
Mar 02, 2026
ನಿನ್ನ ಇರುವಿಕೆಯೇ ನನ್ನ ಬದುಕಿನ ಲಯ.
ಆತ್ಮದ ಜೊತೆ ಬೆಸೆದ ನಂಟು,
ಕನಸು ಮನಸಲ್ಲೂ ಆವರಿಸಿದೆ;
ಜೊತೆಯಾಗಿ ಸಾಗಿದ ಕಥೆಯೆಲ್ಲಾ
ದೃಶ್ಯ ರೂಪಕವಾಗಿ ಮರುಕಳಿಸಿದೆ.
ದಿನದ ಬೆಳಗಲ್ಲಿ — ನಿನ್ನ ಮುಖದರ್ಶನದ ಬಯಕೆ ಮೂಡಿದೆ;
ಗುಂಪಿನೊಳಗಿದ್ದರೂ, ಒಂಟಿ ಎನ್ನುವ ಭಾವ ಕೆಣಕಿದೆ.
ಒಂಟಿಯಾಗಿದ್ದರೂ, ನಿನ್ನ ಮಾತುಗಳೇ ಗುನುಗುನುತಿವೆ;
ನೆನೆಯುವ ಪ್ರತಿ ನಿಮಿಷವು, ಕಣ್ಣು ಕಾಂತಿಯಿಂದ ಮಿನುಗುತ್ತಿದೆ.
ಜಗಳದಲ್ಲಿ ಕಾಣುವ ಪ್ರೀತಿ — ಚಂದ;
ಮುನಿಸಲ್ಲೇ ಕಾಡುವ ನೋಟ — ಚಂದ.
ಆಲಂಗಿಸಿ “ನಾನಿರುವೆ” ಎನ್ನುವ ಪರಿ — ಚಂದ;
ಕುಗ್ಗಲು ಬಿಡದೆ, ಎತ್ತಿ ಹಿಡಿದು ನಡೆಸುವ ಪ್ರೀತಿ — ಚಂದ.
ಮುದ್ದಿಕ್ಕುವ ನಿನ್ನ ಮಾತಿನ ಮೋಡಿಗೆ,
ದುಗುಡವೆಲ್ಲ ಮರೆತು ಮನ ಹಾಡುವುದು.
ಕೆಲವು ಸಮಯದ ನಿನ್ನ ಅಗಲಿಕೆಯ ನೋವಿಗೆಲೇ,
ದಿನರಾತ್ರಿ ಒಂದಾಗಿ ಮೌನಗೀತೆ ಮೊಳಗುವುದು.
ಭವದಾಚೆಗೂ ಬೇಕೆನಿಸುವ ಆತ್ಮ ಸಂಗಾತಿ ನೀನು;
ಬಿಡದಂತೆ ಕಾಪಿಡಬೇಕಿದೆ ಸಂಬಂಧವ — ಹಾಲು-ಜೇನಿನಂತೆ.
ನಿನ್ನ ನೆರಳಾಗಿ ಜೊತೆಯೇ ನಡೆವ ಪ್ರತಿಜ್ಞೆ ನನ್ನದು;
ಉಸಿರು ಇರುವವರೆಗೂ, ಈ ನಂಟು ಅಮರವಾಗಿರಲಿ ಎಂದೇ ಮನದ ಪ್ರಾರ್ಥನೆ.
✍️ಸ್ಮಿತಾ
ಇತ್ತೀಚಿನ ಕಾಮೆಂಟ್ಗಳು
