ಕವನಗಳು
ಮುಂದಿನ ನಿಲ್ದಾಣ
Feb 04, 2026
ಬದುಕೊಂದು ಶಕಟವಾಹನದ ಹಾಗೆ
ಇದಿರಿರಲು ನಿಲ್ದಾಣ ಇಳಿಯದಿರೆ ಹೇಗೆ
ವಿಧಿ ನಿಯಮ ಮೀರುವುದು ತಿಳಿದವರು ಇಲ್ಲ
ಕದ ತಟ್ಟಿ ಎಂದಿಗೂ ಬಳಿ ಬರುವುದಿಲ್ಲ
ಸುತ್ತಲಿರುವವರೆಲ್ಲ ನಮ್ಮಂತೆ ಅಂತೆ
ಎತ್ತಕಡೆ ಹೋದರೂ ಬಿಡದಲ್ಲ ಚಿಂತೆ
ಕತ್ತು ಹೊರಳಿಸಿ ನೋಡಿ ಕಾಣುವುದು ದಾರಿ
ಹತ್ತಿ ಇಳಿಯುತ ನಡೆದು ಗುರಿಯನ್ನು ಸೇರಿ
ಮುಂದಿರುವ ನಿಲ್ಮನೆಯು ಕೊನೆಯದೇ ಎಂದು
ಮಂದಿ ತಿಳಿದಿಲ್ಲ ನಿಜವಾಗಿಯೂ ಇಂದು
ಎಂದಾದರೂ ಮರಣ ಸಂಭವಿಸುದಿಹುದು
ಒಂದು ಹನಿಯೂ ಬಳಿಕ ಸೇರುವುದು ಸಿಂಧು
ಸಾವಕಾಶದಿ ಹೆಜ್ಜೆ ಇಡಬೇಕು ಇಲ್ಲಿ
ನೋವೆಂದರೇನೆಂದು ಅರಿತು ಮನದಲ್ಲಿ
ಯಾವ ಹುತ್ತದಿ ಯಾವ ಹಾವು ಅಡಗಿದೆಯೊ
ದೇವನೂ ಕೈ ಹಿಡಿಯಲಾರ ನೀ ತಿಳಿಯೊ
ಬರುವುದೇನೇ ಬರಲಿ ಎದುರಿಸುವ ನಿತ್ಯ
ಬರೆದಿಹನು ಬೊಮ್ಮ ಹಣೆಬರಹ ಇದು ಸತ್ಯ
ಕರೆದಾಗ ಓಗೊಡದೆ ಇರಲಾಗಬಹುದೆ
ಆರೆಘಳಿಗೆ ಯೋಚಿಸದೆ ಸಾಗೋಣ ಮುಂದೆ
✍️ ಲತಾ ಧನು ಸೀತಾಂಗೋಳಿ
೦೪-೦೩-೨೦೨೬
ಇತ್ತೀಚಿನ ಕಾಮೆಂಟ್ಗಳು
