ಕಲ್ಪನೆ

ಕಲ್ಪನೆ 

ಓ ಕಲ್ಪನೆಯೇ 

ನೀ ನರವ್ಯೂಹದಲಿ 

ರೂಪುಗೊಳ್ಳುವ ವಿಸ್ಮಯ ಲೋಕ 

ಚಿತ್ತ ಜ್ಞಾನದಿ 

ನಿರ್ಮಿಸಬಹುದಾದ ಅಮಿತ ಅಲೋಕ

ಓ ಕಲ್ಪನೆಯೇ 

ನೀ ಕ್ಷಣಾರ್ಧದಿ ಚಲಿಸುವೆ 

ಬೃಹ್ಮಾಂಡದಾಚೆ 

ಕೆಲವೊಮ್ಮೆ ಪರಿತಪಿಸುವೆ 

ಹೊರಬರಲು ಭಾವಜಾಲದಿಂದಾಚೆ

ಓ ಕಲ್ಪನೆಯೇ 

ನೀ ಯುಕ್ತಿಯ ವ್ಯಯಿಸುವ 

ಆಸಕ್ತಿಯ ಶಕ್ತಿ 

ನೀನಿರದೆ ಮನದಲಿ

ಮೂಡುವುದು ನಿರಾಸಕ್ತಿ

ಓ ಕಲ್ಪನೆಯೇ

ನೀ ಬುನಾದಿಯು 

ಅಸಾಧ್ಯವ ಸಾಧಿಸುವ ಹಾದಿಗೆ 

ನೀ ಸ್ಫೂರ್ತಿಯು 

ನವಚಿಂತನೆಗಳ ಆವಿಷ್ಕಾರಕೆ

ಓ ಕಲ್ಪನೆಯೇ

ನಿರ್ಮಲ ಚಿತ್ತದಿ ನೀ ಸೃಷ್ಟಿಸುವೆ 

ಪ್ರಶಾಂತತೆಯ ಬೀಡು 

ಚಂಚಲ ಚಿತ್ತದಿ ನೀ ಕಟ್ಟುವೆ 

ಗೊಂದಲಗಳ ಗೂಡು

ಓ ಕಲ್ಪನೆಯೇ

ಆಗು ನೀ ನನ್ನಲ್ಲಿ 

ಕೌತುಕದ ರೂವಾರಿ 

ಆಗದಿರು ನನ್ನಲ್ಲಿ

ಆತಂಕದ ಸಂಚಾರಿ

                                        - ಮೋಹನ